Ég man glögglega eftir þeim tíma þegar mér fannst sem foreldrar mínir væru gamlir og að þau skildu einfaldlega ekki hvernig það væri að vera ung! Jæja, ég á ekki börn og er rétt að skríða yfir á þrítugsaldurinn en finnst samt sem áður að ég hljóti að vera orðin gömul. Ég var að lesa blogg hjá ónefndri frænku minni sem er á miðjum táningsaldrinum og ég er ekki frá því að ég sé þegar komin á það stig ,,að skilja ekki“. Burtséð frá því að hún talar tungumál sem er mér óskiljanlegt (kommur, punktar og upphrópunarmerki hafa fengið nýja merkingu og orð koma fyrir sem hvergi má finna í orðabók, hvorki íslenskri né erlendum) þá er þetta sjálfhverfasta síða sem ég hef nokkurn tíma séð! Það fer meira fyrir andlitsmyndum af ónefndu frænkunni en texta og hver einasta færsla er fátt annað en lofgjörð um ágæti stúlkunnar og færni hennar í að tæla unga drengi!
Er þetta virkilega það sem hún vill að fólk haldi um sig? Ég fann síðuna hennar þegar ég var að vafra um netið og sá mynd af henni og ákvað því að lesa þetta. Hefði betur látið það eiga sig! En það sýnir bara og sannar að hver sem er getur fundið þetta. Ef ég hefði óstjórnlega löngun til að halda klúrna dagbók þá myndi ég ekki gera það á vettvangi sem amma og afi eiga leið um!
Ég er orðin svo gömul…
5 athugasemdir
Comments feed for this article
febrúar 15, 2007 kl. 5:40 e.h.
Bakkus
Helga mín, þú ERT gömul. Og ég líka (samt yngri hehehehe). Eða hvað? Er þetta kannski bara ÞROSKI??
Ég man þegar við vorum sko hundgamlar og fúlar við einhverja 15 ára polla fyrir utan Laugarásbíó…þetta kom virkilega aftan að okkur. Þroskinn.
febrúar 16, 2007 kl. 1:25 f.h.
Heiðrún
Já Helga mín, ég skil nákvæmlega hvað þú átt við og ástæðan fyrir því er einföld… ég á frænda á miðjum táningsaldrinum!
Ég hef gert ítrekaðar tilraunir til að skilja það sem stendur á blogginu hans og hef loksins gefist upp, sannfærð um að færslurnar séu skrifaðar í dulkóða!
Ég ætla nú ekki að fara að halda því fram að ég sé gömul þar sem enginn er gamall fyrr en hann segir það sjálfur! 🙂
Hinsvegar held ég að bilið milli okkar og kynslóðarinnar rétt á eftir okkur sé óvenjulega stórt! Gæti það verið vegna mikillar kynvæðingar í heiminum á síðustu árum eða er það einfaldlega vegna aukinna jarðskjálfta?
Maður spyr sig!?
febrúar 17, 2007 kl. 11:06 f.h.
Una
Hey! Ef þú ert gömul hvað er ég þá? (ekki svara)
Börn eru bara hætt að vera börn lengur. Þegar ég var barn var ég barn. Í dag eru börn að flýta sér að verða fullorðin… afar slæm þróun.
Talandi um gelgjublogg, þá hef ég gjarnan hneykslast á þeim í gegnum tíðina. Svo var ég einhvern tímann að skoða gamlar bloggfærslur hjá mér og komst að því að ég var ekkert feimin við að nota upphrópunarmerki, auk þess sem dularfull orð eins og „eikkað“ komu gjarnan fyrir. Til hamingju Una. Sem betur fer var ég ekki nærri því eins slæm og margt sem ég hef séð, en þetta sýnir að við getum öll átt okkar stundir…
febrúar 18, 2007 kl. 3:21 e.h.
Gulla
Já ég er ekki að fatta þetta unga fólk í dag.. Sérstaklega ekki hér í danmörku! Ég sé til dæmis ekkert athugavert við það að hlusta á tónlist í gegnum gemsann sinn… en hvað er málið með að gera það á hátalara!!!!! Það virðist sem allir hér 16 ára NEI 19 ára og yngri geri þetta, og jafnvel margir í einu… Það er hryllingur að taka strætó t.d á virkum dögum þegar krakkarnir eru að fara heim úr skólanum.. og svo geta þau ekki talað saman án þess að öskra. Ef ég telst vera orðin gömul vegna þess að þetta pirrar mig þá er ég að drepast úr elli!
febrúar 18, 2007 kl. 5:23 e.h.
Helga
Ó já, Gulla!!! Krakkarnir gera þetta líka hérna í Nürnberg! Ég get alls ekki skilið af hverju þau halda að ég og hrukkótta kellan sem situr hliðiná mér í strætó, hafi áhuga á tónlistinni þeirra! PIRR!!!